السلام عليكم ورحمة الله

وبركاته طبعاً انا ما قلت لكم رمضان كريم لاني كنت مشغوله مره عن السبيس

متأخره بس حلوه لانها مني

وبما ان رمضان كريم خلونا شوي نوقف وقفه مع انفسنا وقفه مع ما حولنا

نوقف نحاسب انفسنا ايش سوينا و ايش راح نسوي ؟ ايش هدفنا ؟

ايش الي فينا غلط و المفروض نعدلو

لمتى راح نعيش بعيدين عن تحمل المسؤلية

مو مسؤلية ولدك او مرتك او اخوك او اختك لا

مسؤلية نفسك مسؤلية امتك دينك وطنك

 كتير ماشين في الدنيا طناش ماعندو هدف او مبدأ مشيت الناس غلط مشيو وراهم بدون تفكير

قلو وطن يقول لك سلم لي على الوطني

تقولو مبدأ يقول لا تعقدها

ليش دايماً نسكت ونعدي

دايماً لمن تكلم واحد يقولك الغرب و الغرب ياخي الغرب الي فرحانين فيهم

و بتخلونا نسيب حجابنا عشان نسير في تطورهم !! ماعندهم دين وانتم عندكم احسن دين

ليش صعب على الشباب العربي انو يكو له شخصيه و هوية تدل عليه

مالو بالمغني الفلاني و الممثله الفلانيه

من رمضان هدا خلو نهج حياتكم غير

غيرو نفسكم ما عليكم بلي يضحك ويتمسخر في يوم راح يندم بس ما راح ينفعو ندمو

اعقدو نية التغير خلي لك مبدأ في حياتك قوانين و هدف اساسي

لا تضيع وقتك على فاضي ولا تسفه نفسك

في احد يسفه نفسو ؟ اكيد في وكثير الي يحطو كل همهم في الاشياء الفاضيه

الوادي سوبر ستار ستاراكادمي وغيرها وغيرها و التريقه و المسخره على الدين

مافي الا مجموعه من الشباب ( الذكر والانثى ) الي تنبسط لمن تكلمهم

تحسهم رسمو صوره لنفسهم وبس ما تشبه اي  احد

وكتيررر تكلمهم و تحس انو مالو هويه ماهو داري عن شي الايام والاصحاب يودو ويجبو

عشان كدا اعزمو وخلو رمضان نقطة انطلاقه لكم

و اوقفو مع نفسكم شويه واسمعوها و ناقشوها

طيب نجي لعشان نوقف مع الي حولنا

جامعاتنا اهلنا الشوارع المجمعات وووو وكل الدنيا

طبعاً و اساس كل شي شخصية الانسان

اذا جا شخص بشخصية حلوه وجذابه لها قيمها ومبادئها

مستحيل اي احد يتعدى عليها و الكل يعمل لها احترام

لكن الي ما يحترم الناس الناس عمرها ما تحترمو ولو الف كتب في الفلسفه و القيم والمبادئ

لان الاخ ما اهتم لاول مبدء وهو احترام الاخرين

يعني لو مشي احد في الشارع ورمى علبة بيبسي او اي شي

هدا ما احترم المجتمع كلو لان الشارع ملك عام وهوا ما احترمو

او يزعج الناس بالمسجل او او او طب انت بتسمع مو مشكله

ترفع الصوت وتزعج البشريه ليه !!

و ياريت من اليوم كل واحد يحاسب نفسو  ويحترم الممتلكات العامه

و يرجع شخص يعتز فيه المجتمع مو نكره يتنكر منو مجتمعو

ونهاية كلامي اقول اللهيصلحني و  يصلح الجميع

ملاحظه :

ياريت ما تضيعو اوقات الشهر الكريم في اغاني ومسلسلات فاضيه كل الي تسوي

تضيع وقتكم و تنكتب عليكم

وزي مافي اعلام منحط في اعلام رائع ونفتخر انو ينتسب لنا

من البرامج الرائعه في رمضان:

أولئك اوناس علموني

الرسول الانسان د\ طارق السويدان

لا تحزن

 أ\أحمد الشقيري خواطر شباب

http://thakafa.net/5awater

 علي ابو الحسن لك صمت

   الشيخ \ سليمان العودع حجر الزاوية

على خطى الحبيب أ \ عمرو خالد

http://forum.amrkhaled.net/forumdisplay.php?f=88

وكل عام وانتو احسن

و كل عام و انتو انقى

و كل عام وانتو اتقى

و كل عام و انتو ارقى